وجه المدافع المصري المعتزل إبراهيم سعيد، رسالة أعرب خلالها عن أنه كان يتمنى أن يوجه قائد منتخب مصر محمد صلاح رسالة شكر لمدرب "الفراعنة" الذي تمت إقالته من تدريب المنتخب المصري قبل يومين. 

وكتب إبراهيم سعيد عبر صفحته على منصة "إكس"، تويتر سابقًا: "أنا عارف إن الكلام ده ممكن يزعل ناس كتير جداً مني لكن أنا بتكلم عن مبدأ عشته واتربيت عليه ومش هغير قناعتي علشان أرضي حد. كنت أتمنى من محمد صلاح كابتن منتخب مصر أن ينشر بوست تقدير واحترام للأسطورة والكابتن التاريخي حسام حسن". 

وأضاف المدافع الدولي السابق قائلًا: "وأنا هنا مش بتكلم عن مجاملة أو واجب اجتماعي أنا بتكلم عن مبدأ اتعلمته وعشت بيه طوال مشواري الكروي.على مدار تاريخي كلاعب اتعلمت إنك تحترم كابتنك وتحترم اللي سبقوك وتحترم رموز اللعبة وتاريخها مهما اختلفت معاهم ومهما كانت وجهة نظرك فيهم. وكان ليا موقف مع الكابتن محمود الجوهري رحمة الله عليه بعد ترحيلي من مالي من قائمة منتخب مصر في كأس الأمم الأفريقية بسبب تأخير عن الميعاد التواجد في الغرفة". 

وتابع إبراهيم سعيد: "ورغم الموقف الصعب ده ورغم أي اختلاف حصل بيننا عمري في حياتي ما اتكلمت عنه بشكل يقلل منه أو من تاريخه. لأنه في النهاية أسطورة في عالم التدريب وواحد من أهم الأسماء اللي صنعت تاريخ الكرة المصرية وكان من أصحاب الفضل علي بعد ربنا وساندني في أصعب أزماتي. وده درس عمره ما هيتنسي. دي مش مسألة اتفاق أو اختلاف ولا مين أكبر من مين ولا مين نجم عالمي ومين أسطورة محلية أو إفريقية.  دي مسألة أصول ومبادئ وتربية واحترام لتاريخ بلدك ورموزها". 

وأضاف: "محمد صلاح نجم كبير ونجاحه فخر لمصر لكن كنت أتمنى منه تحديداً بصفته كابتن منتخب مصر أن تكون عنده لفتة تقدير واحترام تجاه حسام حسن. النجومية مش بس أرقام وألقاب واحتراف عالمي النجومية كمان مواقف وأخلاق وتقدير للناس اللي صنعت تاريخ قبلك.أنا اتعلمت إنك ممكن تختلف مع أي حد وممكن تختلف معاه في أصعب المواقف لكن عمرك ما تنسى قيمته ولا تاريخه". 

وختم إبراهيم سعيد بالقول: "أنا مش بقول الكلام ده علشان أكسب إعجاب حد ولا خايف أخسر إعجاب حد دي قناعتي وده المبدأ اللي عشت بيه واللي مش هغيره لا علشان شهرة ولا نجومية ولا حسابات.بالتوفيق لمنتخب مصر الفترة القادمة"، حسب قوله. 

وربط البعض قرار إقالة حسام حسن بوجود "خلاف" مع محمد صلاح بسبب استبداله في مباراة منتخب مصر وأنغولا عند الدقيقة 62، وهي آراء لم تُدعم بأي أدلة، كما أنه لم يصدر أي تعليق من صلاح أو حسام حسن أو الاتحاد المصري لكرة القدم حول هذه الشائعات. 

وأعلن الاتحاد المصري لكرة القدم عبر حساباته في منصات التواصل الاجتماعي، السبت، إنهاء عقد مدرب "الفراعنة"، حسام حسن، ومدير المنتخب، شقيقه إبراهيم، وتعيين علي ماهر خليفة له.